• Galego
  • Español

O programa Porta a Porta chegará a Burela o 28 de abril con consultas gratuítas de audioloxía, podoloxía e memoria

Destes servizos poderán beneficiarse persoas maiores de 55 anos solicitando cita previa no teléfono 622 748 283 ou no correo electrónico coidadosportaaporta.politicasocial@xunta.gal

O xoves 28 de abril realizarase unha primeira toma de contacto para as persoas interesadas no Salón de Plenos ás 10 horas

O autobús que presta os distintos servizos estará na Praza do Concello de Burela os días 28 e 29 de abril e o 2 e 3 de maio

Burela, 14 de abril de 2022.-  O Concello de Burela informa de que o programa Porta a Porta da Xunta de Galicia chegará á localidade o vindeiro 28 de abril, día que se realizará unha primeira toma de contacto para as persoas interesadas no Salón de Plenos ás 10 horas.

O programa ofrece consultas de audioloxía, podoloxía e estimulación da memoria destinado a todas as persoas maiores de 55 anos que así o desexen, con cita previa e de xeito gratuíto.

O autobús do Porta a Porta estará na Praza do Concello de Burela os días 28 e 29 de abril e o 2 e 3 de maio co fin de prestar servizos asistenciais ás persoas maiores, debendo solicitar cita previa no teléfono 622 748 283 ou no correo electrónico coidadosportaaporta.politicasocial@xunta.gal

No servizo de podoloxía farase unha consulta básica, valorando o estado xeral do pé, así como un corte e limpeza de unllas e eliminación de durezas, calos e helomas. En audioloxía realizarase unha valoración e exploración funcional da audición e prevención da perda auditiva. Coa estimulación cognitiva, un profesional fará unha valoración cognitiva e achegará as pautas desde unha perspectiva terapéutica de como previr e aminorar un deterioro en caso de habelo.

O prazo de inscrición xa está aberto para todas as persoas interesadas e que cumpran os requisitos, habendo unha primeira xornada explicativa dos servizos.