• Galego
  • Español

O Concello de Burela renova a pista do pavillón deportivo municipal de Vista Alegre

Foron destinados a este fin preto de 87.000 euros exclusivamente de fondos municipais

Substituíuse o chan de madeira existente por un pavimento deportivo de parqué co correspondente marcado de pista para baloncesto, fútbol sala e balonmán

A intención do executivo local é potenciar este espazo como unha pista polideportiva de calidade na que se podan realizar distintas disciplinas


Burela, 15 de setembro de 2022.-  O alcalde de Burela, Alfredo Llano, e o concelleiro delegado en Deportes, Ramiro Fernández, supervisaron o acabado da obra de mellora na pista deportiva do pavillón municipal de Vista Alegre, para a que se destinaron un total de 86.991,64 euros de fondos propios.

Nas últimas semanas procedeuse á retirada do chan de madeira existente para o posterior subministro e colocación dun pavimento deportivo de madeira laminada, rematando os traballos co marcado e pintado perimetral desta pista polideportiva de baloncesto, fútbol sala e balonmán.

Tanto o alcalde como o tenente de alcalde amosáronse satisfeitos co resultado dun espazo “que precisaba dunha mellora pola súa antigüidade e o elevado uso deportivo, co fin de que tanto os equipos de fútbol sala como o club de baloncesto podan adestrar nunhas instalacións de calidade”.

O pavimento instalado é de madeira área-elástico, o máis axeitado para multiusos de interiores e alta competición en baloncesto, balonmán e futsal, cumprindo cos requisitos da Normativa de Estándares Europeos. Segundo afirmou o edil de Deportes, “era unha actuación moi solicitada polos clubes, polo que seguimos cumprindo co compromiso de mellorar as instalacións deportivas e apoiar o deporte”.

A mellora do chan do pavillón tamén “evitará lesións nos deportistas”, explicou Fernández, conseguindo con esta obra que “a instalación municipal adquira unha categoría importante equiparable aos pavillóns de calquera cidade”, destacou.

O equipo feminino do Pescados Rubén Burela FS estreará esta pista de parqué completamente nova co partido que disputarán o sábado pola tarde contra o Sala Zaragoza.

Ramiro Fernández aseverou que “seguiremos impulsando accións nas instalacións deportivas para que a práctica do deporte teña a mellor calidade posible”, anunciando que “en breves agardamos ter boas novas respectou doutras instalacións da localidade”.