O Concello de Burela contratará 2 prazas de peón, 1 de condutor e 1 de capataz para as brigadas contra incendios

As bases publicaranse mañá venres no Boletín Oficial da Provincia e haberá un prazo de 5 días naturais contados a partir do día seguinte á publicación
As persoas interesadas poderán apuntarse desde este sábado ata o próximo mércores incluído, tanto de forma telemática como presencialmente no Concello o martes ou o mércores
A brigada contra incendios forestais operará en Burela durante un período de tres meses

Burela, 21 de xullo de 2022.-  O Concello de Burela abre o proceso selectivo para cubrir 4 prazas da brigada de prevención e defensa contra incendios forestais, en concreto, dúas delas convocaranse para peóns, unha para peón condutor e outra para capataz.

As bases sairán publicadas no Boletín Oficial da Provincia (BOP) deste venres 22 de xullo, cun prazo de presentación de solicitudes de 5 días naturais desde o día seguinte á publicación, é dicir, desde o sábado 23 ao mércores 27 de xullo. Polo tanto, as persoas interesadas poderán presentar as instancias de forma telemática desde o sábado ata o mércores incluído, e de xeito presencial tanto o martes 26 como o mércores 27 de xullo nas oficinas de rexistro do concello.

A brigada contra incendios forestais que se forme do proceso de selección operará en Burela durante un período de 3 meses.

O alcalde de Burela, Alfredo Llano, informou da publicación das bases e animou “ás persoas que podan estar interesadas a que participen do proceso e aproveiten esta oportunidade”.