O Concello de Burela acolle a exposición de arte 'Viaxando' no parque de Rosalía de Castro

• A mostra itinerante das coleccións de arte de Afundación estará dispoñible ata o día 10 de xullo

Burela, 18 de xuño de 2024. O Concello de Burela acolle, no parque de Rosalía de Castro, a exposición de arte na rúa 'Viaxando', organizada por Afundación.

Esta mostra itinerante, que conta con pezas das coleccións de arte de Afundación e Abanca, estará dispoñible para a súa visita ata o día 10 de xullo, tras o cal seguerá percorrendo diferentes localidades galegas.

Nas diferentes obras da exposición aparecen reflectidos diferentes lugares de todo o mundo, co obxectivo de permitir ás persoas que visiten a mostra desfrutar de viaxar a través da arte.

A cronoloxía das pezas vai dende finais do século XIX ata a actualidade, e cada unha delas vén acompañada dun breve texto divulgativo escrito pola crítica de arte Mercedes Rozas.

A alcaldesa Carmela López destaca que "estas iniciativas permiten desfrutar de xeito gratuíto da arte nas nosas rúas, enchendo o parque de Rosalía de Castro de obras fermosas".