Alfredo Llano recibe ás traballadoras do Consorcio Galego e escoita as peticións sobre a súa situación laboral

O rexedor trasladoulles o compromiso de falar co xerente do Consorcio para interesarse polo tema tras tomar nota dos seus reclamos

As traballadoras piden que se teñan en conta os anos de traballo á hora de facer a estabilización de postos que require a lei

Iniciaron unha folga o 5 de setembro que se prolongará ata o mes de decembro en períodos de 15 días

Burela, 14 de setembro de 2022.-  O alcalde de Burela, Alfredo Llano, recibiu esta mañá a un grupo de traballadoras do Consorcio Galego de Servizos de Igualdade e Benestar, dependente da Xunta de Galicia, en folga desde o 5 de setembro para reclamar un proceso de estabilización dos postos de traballo “máis xusto”.

Así llo trasladaron ao alcalde, subliñando que existe o risco de perder os postos de traballo (1.500 en total), dos cales o 90% son contratos temporais e asumidos por mulleres en escolas infantís, oficinas de inclusión, centros de día, etc. 

“As traballadoras afirman que non se tería en conta a súa experiencia laboral á hora de estabilizar os postos, que nalgúns casos é de 15 anos desempeñando o seu traballo,  unha situación que sorprende e ante a cal eu falarei persoalmente co xerente do consorcio”, afirmou Llano. 

A folga iniciada neste mes de setembro prolongarase ata decembro (en períodos de 15 días) motivada polo desacordo na aplicación da norma e no procedemento establecido, que segundo afirman, “prexudícanos porque non están a ter en conta as circunstancias do consorcio como ente diferenciado da Xunta”, pedindo que “se equipare con entes xuridicamente iguais e que se nos escoite”.

O rexedor mantivo este encontro para escoitar as peticións respecto da súa situación laboral, interesándose pola información trasladada e comprometéndose a falar co xerente para buscar unha solución consensuada e tendo en conta a situación destas persoas.