Banco - Escultura do castiñeiro centenario

Neste lugar existía un souto que co paso do tempo foi desaparecendo. Nas últimas décadas contaba só cun exemplar: o querido castiñeiro centenario. Esta árbore comezou a enfermar e a inicios de 2024 os fortes refachos da borrasca Karlotta acabaron por derrubala.

En xullo do mesmo ano realizouse co seu tronco un banco escultórico que lamentablemente foi incendiado de xeito intencionado. Sen renderse, o escultor Carlos García reutilizou os restos que quedaban para crear un novo banco-escultura de cinco metros chamado ‘Nai Terra’, que podemos ver no mesmo lugar desde decembro de 2025.

O castiñeiro segue a ser un símbolo e un recordo para todos os bureleses, sobre todo para os nosos maiores. Co novo banco-escultura creouse un espazo interxeracional, no que os recordos dos máis vellos e o xogo e fantasía dos máis novos se xuntan.

Desde aquí parte a pequena ruta pola Vila do Medio, adentrándonos no camiño de Cinoche á beira do río Pomeda, para descubrir todo o que agocha un dos primeiros barrios de Burela.