Casa da Cultura de Burela
Sábado 11 de outubro de 2025 ás 18:00 horas
Público: Infantil-Familiar

«Pakolas”, rockeiro e guitarreiro, é o nome co que Paco Cerdeira se presenta ante o público infantil, eido no que o músico conta con longa traxectoria.  Neste concerto, Pakolas guiaranos coa súa forza interpretativa e o seu humor por todo un universo musical, a través da súa voz e a guitarra, nun espectáculo individual creado polo propio autor, onde a interacción e participación coas nenas e nenos, a animación, as súas caracterizacións e a súa música son o principal atractivo para o público.

En “Ecoralia, a lambona ecolóxica” Pakolas preséntanos o seu último librodisco. Contaremos e cantaremos a historia de Ecoralia, que nos ensinará a través das súas cancións a importancia de consumir alimentos ecolóxicos, para coidar o medio ambiente tanto na terra coma no mar, combater o cambio climático e garantir o benestar animal.

Así, a través das cancións e a narración, adentramos nas entrañas da carballeira máis extensa de toda Galicia, onde a vexetación é máis mesta e verde, vivía Ecoralia. Sempre vestía da cor do musgo e levaba unha trenza longa e roxa recollida cun estalote. Ecoralia era unha meiga moi nova e boa coñecedora de conxuros ancestrais aprendidos das súas avoas. Pero ela non era coma as demais.

Ademais de Ecoralia, moitas personaxes poderedes coñecer neste novo traballo musical, como o seu compañeiro Mistín, o lucecú, que vivía no medio das flores amarelas de xestas empregadas para os os seus conxuros. E, se Ecoralia era diferente ás demais meigas, Mistín era diferente aos demais lucecús, xa que tiña un semáforo no traseiro! Ramón o teixugo dispoñía do ultramarinos da vila. Sempre había alimentos coa etiqueta ECO de CRAEGA: froitas e legumes, leite, carne, ovos, mel e mesmo alimentos do mar. Os alimentos ecolóxicos sempre sentaban ben!. Tamén as tías Rosa e Mónica, dúas irmás xemelgas que coidaban das súas hortas coma ninguén. E por último Don Arsenio, que recollía unhas enormes mazás todo o ano! Como podía ser? Todas estas personaxes e historias poderás coñecer neste novo espectáculo rockeiro, e desvelar este misterio.

En definitiva un espectáculo para compartir cos mais peques e coa familia.

OBRADOIROS DE CONSTRUCIÓN E ANIMACIÓN

CASA DA CULTURA | BIBLIOTECA PÚBLICA MUNICIPAL

Sábado 18 de outubro de 2025 de 11:30 a 12:30 horas

> Público familiar | Nenas e nenos a partir de 3 anos
> O ideal é que cada nena ou neno realice o obradoiro cos seus proxenitores
> Prazo de inscrición ata o xoves 16 de outubro de 2025 na Biblioteca Pública Municipal de Burela de 09:00 a 13:00 e de 17:00 a 20:00 horas
> Grupo máximo de 40 nenas e nenos por rigorosa orde de inscrición

+Info: Descargar a ficha de inscrición

CASA DA CULTURA DE BURELA

Venres 24 de outubro de 2025 ás 21:00 horas

> Público + 12 anos
> Entrada de balde

O teatro e a educación únense en Burela co proxecto ‘En Carne Viva’ e os seus obradoiros para a mocidade

• A Casa da Cultura acollerá o 24 de outubro a representación da obra ‘En Carne Viva’, acompañada dun plan formativo integral para o alumnado do IES Monte Castelo que promove a reflexión, o pensamento crítico e a educación en valores.

A Casa da Cultura de Burela converterase o vindeiro 24 de outubro ás 21:00 horas nun punto de encontro entre a arte, a educación e a reflexión coa representación da obra ‘En Carne Viva’, da compañía Bengala Teatro Físico, dirixida e escrita por An González.   

“Este proxecto é un exemplo de como o teatro pode ir máis alá do escenario”, explicaba a concelleira de Cultura, Lina Gómez, quen destacou a capacidade da arte escénica para provocar emoción e pensamento. En colaboración co IES Monte Castelo, o proxecto inclúe un plan formativo integral dirixido ao alumnado de secundaria que combina obradoiros de creación escénica, a asistencia á obra e un espazo posterior de reflexión colectiva.

“Dita colaboración permítenos achegar á mocidade unha experiencia cultural completa, que mestura arte, emoción e pensamento crítico”, engadía Gómez, subliñando o valor educativo e social desta iniciativa.

A través do obradoiro titulado ‘O que soñamos pola noite, pero non nos atrevemos a dicir durante o día’, o alumnado traballa dende o corpo, a escritura e a improvisación teatral para transformar pensamentos íntimos en creación artística colectiva. As sesións abordan cuestións como o bullying, a disforia de xénero, o feminismo, a conciliación familiar ou o estigma social, sempre dende un enfoque empático e de respecto.

A concelleira de Igualdade, Alexandra Fernández, subliñaba precisamente esa dimensión humana e transformadora dos obradoiros.

“Os obradoiros de En Carne Viva abordan temas tan importantes como a diversidade, o respecto, o feminismo ou a identidade persoal, e fano desde a empatía e o coidado. Este tipo de actividades axudan ao alumnado a expresarse, a entender as súas emocións e a respectar as diferenzas”, explicaba Fernández.

Pola súa parte, a obra ‘En Carne Viva’ propón unha viaxe emocional e simbólica a través da identidade, o xénero, o amor e a frustración. Inspirada libremente en ‘La vida es sueño’ de Calderón de la Barca, na película ‘Laurence Anyways’ de Xavier Dolan e en testemuños anónimos, a peza transita entre a poesía e a denuncia social, amosando a loita das persoas por sobrevivir nunha sociedade deshumanizada.

A función, dirixida a público adulto, terá lugar o 24 de outubro na Casa da Cultura de Burela, con entrada de balde.

50 anos do disco ROSALÍA DE CASTRO 1975-2025

Casa da Cultura de Burela
Sábado 25 de outubro de 2025 ás 20:30 horas
Entradas á venda en Ataquilla

Celebrar medio século dun disco é celebrar a viaxe de toda unha vida. Hai cincuenta anos, Amancio Prada iniciou unha peregrinación sonora ao corazón da poesía de Rosalía de Castro, e aquel primeiro paso, o seu lendario álbum, converteuse no compás que guiou a súa traxectoria. Este concerto é un miradoiro nese camiño para contemplar a paisaxe percorrida: dende a pureza núa das primeiras cancións, convertidas xa en parte da nosa memoria colectiva, ata as relecturas maduras que amosan como medrou o diálogo íntimo coa poeta. A voz de Prada, hoxe máis ca nunca, é a resonancia dese longo camiñar, pois atesoura a devoción do primeiro día e a sabedoría de quen fixo dos versos doutro o seu propio fogar. Máis ca un aniversario, este concerto é unha cerimonia de gratitude, unha ocasión irrepetible para sermos testemuñas de como un canto se fixo refuxio e a poesía, destino.

A Lola son todas as mulleres que sobreviviron aos seus maridos, arrebatados polo terror franquista.
O relato xoga co presente (mediados dos anos sesenta) e o pasado (os anos da II República e os inmediatamente posteriores ao golpe militar de xullo de 1936).
A súa trama está determinada polo “pasado non ausente”  polo feito de que o sucedido nos anos da represión posterior ao golpe de estado franquista segue a determinar as vidas e as condutas das novas xeracións, porque o silencio sobre aqueles feitos impide a superación do trauma.
David e Teresa, mozos abertos aos novos aires que comezan a infiltrarse na sociedade española, deciden casar e visitan a casa nativa para comunicarllo aos seus pais. Pero os traumas do pasado seguen presentes: a historia  dos  pais  de  Teresa,  familia  comprometida  dende  o  primeiro momento co novo réxime de Franco e a dos pais de David, identificados cos ideais republicanos, frustran os desexos dos mozos.
Na  obra  recréase  o  ambiente,  ideais  e  confrontacións  entre  dúas formas  de  entender  a  sociedade:  os  valores  da  tradición  patriarcal  e escolástica dos golpistas fronte ao proxecto constitucional-republicano de progreso e liberdade. 

Dirección e escenografía: Avelaíña Teatro

Interpretación: Amparo Urtaza, Manolo Ayán, Miguel A. Martín, Xulio Leal, Marisé Pérez, Pilar Pérez e Xosé Álvarez

Música e son: Miguel Martín. Iluminación: Miguel Martín. Soporte informático: Juan Iglesias