O Concello de Burela abre o novo aparcamento de Leandro Cucurny e José María González Río

• Trátase do primeiro dos novos aparcadoiros previstos no Plan de Mobilidade Urbana Sostible e conta con 43 prazas

Burela, 13 de outubro de 2025. Esta mañá abriu ao público o novo aparcamento municipal situado entre as rúas Leandro Cucurny e José María González Río, que ofrece 43 prazas de estacionamento, das cales unha está reservada para vehículos de persoas con mobilidade reducida.

A partir do martes 14 de outubro cambiarase o sentido de circulación do tramo de Leandro Cucurny comprendido entre Curros Enríquez e Lamestra, dentro das actuacións do Plan de Mobilidade Urbana Sostible de Burela, dando así por concluídos os axustes previstos nesta contorna.

A alcaldesa de Burela, Carmela López, destacou que “con este abrimos o primeiro dos novos aparcadoiros que temos previstos poñer en marcha. É unha mellora que forma parte dun conxunto de actuacións pensadas para facer de Burela unha vila máis accesible e cómoda para todos e todas”.

Carmela López engadiu que “estes cambios de circulación e os novos espazos de estacionamento axudan a crear un tráfico máis fluído e seguro, respondendo ás demandas da veciñanza”.