• Galego
  • Español

Burela expón información turística cun stand na Semana Verde de Silleda, que recupera a súa 44 edición tras a pandemia

O Concello de Burela está presente nesta Feira Internacional con información turística dos principais atractivos da localidade

Promocionarase neste días a Feira do Bonito que se celebra a primeira fin de semana de agosto, declarada Festa de Interese Turístico Nacional 

“Aproveitamos esta oportunidade de promoción da nosa cultura, gastronomía, e costumes que fan de Burela un destino único”

Burela, 2 de xuño de 2022.-  O Concello de Burela estará presente na Feira Internacional Abanca Semana Verde de Galicia, que se recupera tras a pandemia e abre hoxe as súas portas na 44 edición. Preto de 700 expositores e máis de 200 firmas de 24 países participarán no recinto ferial Abanca, no Concello de Silleda, ata este domingo.

Burela ten o seu espazo cun stand no que se dará promoción da vila, un privilexiado balcón ao Cantábrico que destaca pola importancia do seu porto a nivel socioeconómico, pola súa afamada gastronomía co bonito de Burela e a merluza do pincho, as súas paisaxes de mar e montaña, a xeoloxía que a converte nun lugar único a nivel patrimonial, o barco boniteiro “Reina del Carmen”, un auténtico museo sobre o mar, así como eventos destacados no calendario como as súas festas patronais coa tradición das alfombras florais temáticas ou a feira náutico-pesqueira de Expomar.

Ademais, a Feira do Bonito de Burela terá un lugar especial na promoción da vila, declarada Festa de Interese Turístico Nacional no ano 2019. Unha tradición lonxeva que cumpre máis de 30 anos despregando no peirao de Burela un evento gastronómico único na primeira fin de semana de agosto, maridado con degustacións e música tradicional. Unha verdadeira exaltación gastronómica para degustar o famoso túnido nas especialidades típicas, como a empanada, o cocido ou asado á grella. 

En palabras do concelleiro de Turismo, Ramiro Fernández, “aproveitamos unha vez máis a oportunidade que brinda esta feira internacional de dar a coñecer todo o bo que ten Burela, que é moito, non só a nivel cultural, patrimonial e gastronómico, senón tamén para visibilizar valores que atravesan todas as nosas tradicións, como a pesca sostible, o respecto aos ecosistemas mariños e a aposta decidida por un mundo verde”.