A Ocioteca de Verán realiza unha campaña sobre o problema das cabichas nos areais e reparte cinceiros ecolóxicos

Instalouse un stand informativo e repartíronse cinceiros nas praias da Marosa e do Portelo, deixando material á disposición da xente nos postos de socorrismo

As monitoras tamén estiveron cos nenos e nenas na praia do Ril, un espazo sen fume, explicando o impacto dos restos do tabaco e a contaminación que sofre o mar, os areais e a fauna da zona

As actividades de concienciación desenvolvéronse no marco do programa Bandeira Azul no que participa o Concello de Burela 

Burela, 8 de xullo de 2022.-  A Ocioteca de Verán do Concello de Burela vén de realizar unha campaña de concienciación social sobre o problema das cabichas do tabaco nas praias do municipio pola contaminación que xeneran tanto nas augas do mar como na fauna autóctona.

As monitoras comezaron explicando aos nenos e nenas da Ocioteca o impacto das cabichas nos areais, que supoñen máis do 30% dos desperdicios. Desprazáronse á praia do Ril (praia sen fume) para falar sobre a contaminación que deixan no mar, pois os compoñentes tóxicos das cabichas con substancias químicas moi nocivas libéranse ao contactar coa auga, cuns efectos devastadores sobre o medio ambiente. Tamén afectan á fauna, posto que as plantas absorben os materiais que desprenden, perxudicando asemade a aves e peixes. 

Os máis pequenos aprenderon que os restos do tabaco teñen ata 400 compoñentes tóxicos que contaminan o medio, polo que é imprescindible non tiralos ao chan. Coa axuda de fotografías de praias ateigadas de cabichas comprenderon a grave problemática que supón, especialmente nos espazos próximos ao mar.

Por outra banda, as monitoras de Gaia instalaron na praia do Portelo un stand informativo co obxectivo de concienciar aos usarios e usarias das praias a preservar a limpeza dos espazos públicos, evitando a contaminación. Repartiron tanto no Portelo como na Marosa uns cinceiros ecolóxicos para evitar que as persoas adultas tiren as cabichas do tabaco ao areal, mar ou paseo. Despois, deixaron estes cinceiros nos postos de socorrismo para aquelas persoas que se queiran facer con un.