• Galego
  • Español

A ASOCIACIÓN AFAN PON EN MARCHA UN PROGRAMA DE PREVENCIÓN DO DETERIORO COGNITIVO PARA MAIORES DE 55 ANOS EN BURELA

A Asociación de Familiares de enfermos de Alzheimer e outras demencias (AFAN) de Burela poñerá en marcha no mes de marzo o Programa Move a Mente, un programa pioneiro de prevención do deterioro cognitivo e detección precoz das demencias dirixido a persoas maiores de 55 anos.  Será totalmente gratuito para os asistentes grazas á subvención concedida para a realización de programas de interese xeral para fins de carácter social con cargo á asignación tribuitaria do 0.7% do IRPF (Consellería de Política Social e Xuventude – Federación Alzheimer Galicia).

Con este programa a entidade non só pretende estimular e manter as capacidades cognitivas dos asistentes senón que realizará un cribado a través dunha valoración cognitiva inicial de cada participante, así como outra de seguemento e unha final, co fin de detectar de xeito precoz calquera indicio dunha posible demencia e poder así derivar e atender a tempo estas doenzas.  Para iso a entidade conta cun equipo multidisciplinar formado por profesionais especializados que se encargarán de levalo a cabo ao longo de todo o ano.

O programa terá lugar na sede social, cedida polo Concello de Burela,  que a asociación ten ubicada na Casa do Mar de Burela e conta con 20 prazas que poderán ser distribuidas en dous grupos  de traballo e en sesións de dúas horas semanais.  

As persoas interesadas poden inscribirse previamente chamando ao teléfono 982580610 .