As que limpan
Chega a Burela As que limpan, unha sátira utópica de A Panadaría sobre o traballo e loita das camareiras de piso.
Areta Bolado, Noelia Castro e Ailén Kendelman son as autoras, directoras e intérpretes desta coprodución da súa compañía, A Panadaría, co Centro Dramático Nacional.
A obra, que conta xa con dous premios, retrata con humor a loita das camareiras de piso por alcanzar uns dereitos laborais e sociais xustos ao tempo que pon sobre a mesa a fenda de xénero nos traballos de limpeza e coidados.
O título fai referencia ás coñecidas como ‘las Kellys’, movemento no que as traballadoras da limpeza dos hoteis se organizaron para reivindicar unha mellora nas súas condicións laborais e prestixio social. Son «‘As que limpan’, as invisibles que carretan ao lombo un sistema turístico precarizador», segundo a compañía de teatro.
A Panadaría quere, con esta proposta satírica e musical, «aproveitar a visibilidade que nos permite a escena para xerar debate sobre como o noso sistema económico sostense e funciona grazas á explotación das mulleres. Tamén atravesa a peza unha preocupación polo modelo de turismo español e como este vampiriza a vida das persoas mais tamén dos territorios».
Así, o argumento da obra articúlase arredor da visita dunha presonalidade política a un luxoso hotel-balneario galego xestionado por un empresario corrupto para mostrarnos, a través do humor e de áxiles gags, toda a problemática das camareiras de piso nun alegato que vai máis aló das reivindicacións laborais do sector para facernos reflexional sobre «a fenda de xénero na limpeza e nos coidados, altamente feminizados e precarizados».
Casa da Cultura de Burela
Sábado 5 de novembro de 2022 ás 21:00 horas
Prezo: 4,00 euros
Público: adulto
Entradas a venda na Casa da Cultura de 20:30 a 21:00 horas